የዋና እምባ ጠባቂው መልክት

ክብርት ወ/ሮ ፎዚያ አሚን በሚኒስትር ማዕረግ ዋና ዕንባ ጠባቂ

የኢፌዴሪ የሕዝብ እንባ ጠባቂ ተቋም ዜጐችን የመልካም አስተዳደር ተጠቃሚ ለማድረግ ግልጽነት ቀልጣፋና ጥራት ያለው የመንግሥት አስተዳደር እንዲሰፍን የማድረግ ራዕይ ያለው ተቋም ነው፡፡

ተቋሙ በአገራችን የመልካም አስተዳደር ባህል እንዲዳብር እና የሕግ የበላይነት እንዲረጋገጥ የበኩሉን ድርሻ እየተወጣ ይገኛል፡፡ በመንግሥት መሥሪያ ቤቶችና በልማት ድርጅቶች የሚታዩ የአስተዳደር በደሎች እንዲወገዱ ከማድረግ አኳያ በእነዚህ ተቋማትና በዜጐች መካከል የሚነሱ ቅሬታዎችን በአግባቡ ተቀብሎ በመመርመር የመፍትሔ ሃሣቦችን ያቀርባል፡፡

በተጨማሪም ለአስተዳደር በደሎች መነሻ የሚሆኑ የሕግ ክፍቶችን በማጥናት እንዲሻሻሉና የእርምት እርምጃዎች እንዲወሰዱ በማሳሰብ የመልካም አስተዳደር ግንባታ ሂደት እንዲጠናከር የበኩሉን ጥረት ያደርጋል፡፡

የሕዝብ እንባ ጠባቂ ተቋም የተሰጠውን ይህንን ግዙፍ ኃላፊነት ብቻውን የሚወጣው ባለመሆኑ የሁሉንም ባለድርሻ አካላት ርብርብ ይጠይቃል፡፡ በዚህ መሠረት ሕብረተሰቡ ስለመልካም አስተዳደር መርሆችና ስለሕግ የበላይነት ያለውን ግንዛቤ ማሳደግ የቅድሚያ ትኩረት የሚሰጠው ተግባር ሆኗል፡፡

ይህንን ተግባርና ኃላፊነት በአግባቡ ለመወጣት ቀልጣፋና ውጤታማ የኮሙኒኬሽን ስትራቴጂ ሊኖረው እንደሚገባ ይታወቃል፡፡ ከሕብረተሰቡ መረጃዎችን የሚቀበልባቸውና መልሶም ለሕብረተሰቡ አስፈላጊ መረጃዎችን የሚያሰራጭባቸው ልዩ ልዩ ስልቶችን መቀየስ አስፈላጊ በመሆኑ የዚህ ድረ-ገጽ መከፈት እንደ አንድ አማራጭ መንገድ የሚታይ ይሆናል፡፡ የድረ-ገጹ መከፈት በአገራችን የመልካም አስተዳደር መርሆችንና ሌሎች መረጃዎችን ለማሰራጨት ብርቱ እገዛ ይኖረዋል፡፡

በተጨማሪም የሁለትዮሽ የመረጃ ልውውጥ መድረክ በመሆን ምቹ ሁኔታዎችን ከመፍጠሩም ባሻገር በተቋሙ የስልጣን ክልል ውስጥ በሚወድቁ ጉዳዮች ዙሪያ ለዜጐች አጠቃላይ የማማከርና የሙያ ድጋፎች ለማድረግ በመሣሪያነት ያገለግላል፡፡

ይህ ድረ - ገጽ ሕብረተሰቡ ከተቋሙ ጋር የሚገናኝበት አንድ ተጨማሪ የመገናኛ ዘዴ ከመሆኑም በላይ በቀላሉ ቅሬታዎችን ወደ ተቋሙ ለመላክ የሚያስችል እድል በመሆኑ ዜጐች በሰፊው ይጠቀሙበታል የሚል እምነት አለን፡፡

የተቋሙ አቤቱታ የማስተናገድ ስልጣን

ለ ኢ.ፌ.ዲ.ሪ የሕዝብ ዕንባ ጠባቂ ተቋም መቅረብ የሚችሉ አቤቱታዎች

• የፌደራል መንግስት ሚኒስቴር መ/ቤቶች ኮሚሽኖች ኤጀንሲዎች ኢንስቲትዩቶች ድርጅቶችና የነዚህ አካላት ኃላፊዎች የሚያሣልፉት ውሣኔዎች የሚያወጡት መመሪያዎችና የሚወስዱት እርምጃዎችን የሚመለከቱ አቤቱታዎች
• የክልል መንግሥታት አስፈፃሚ አካላትና በነሱ ሥር የሚገኙ ተቋሞችና ኃላፊዎች የሚያስተላልፉት ውሣኔ የሚያወጡት መመሪያና የሚወስዱት እርምጃን የሚመለከቱ አቤቱታዎች
• የፌደራልም ሆነ የክልል ፍ/ቤቶች የአገር መከላከያና ደህንነት የፌደራልም ሆነ የክልል ማረሚያ ቤቶች ውስጥ ያሉ የአስተዳደርና ፋይናንስ ዘርፎች /ጠቅላላ አገልግሎት ክፍሎች/ የሚያሳልፉት ውሣኔዎችን የሚያወጡት መመሪያዎችንና የሚወስዱት እርምጃዎችን የሚመለከቱ አቤቱታዎች

የኢ.ፌ.ዲ.ሪ. የሕዝብ ዕንባ ጠባቂ ተቋም የማያስተናግዳቸው አቤቱታዎች

• በማናቸውም ደረጃ በፌዴራልም ሆነ በክልል ፍ/ቤቶች በመታየት ላይ ያሉ ጉዳዮችን የሚመለከቱ አቤቱታዎች፤
• የፌዴራልም ሆነ የክልል ምክር ቤቶች /ፓርላማዎች/ በሕግ አውጪነታቸው የሚያሳልፉት ውሣኔዎችን የሚመለከቱ አቤቱታዎች፤
• በዋና ኦዲተር መ/ቤት በመታየት ላይ ያሉ ጉዳዮችን የሚመለከቱ አቤቱታዎች፤
• በጸጥታ ኃይሎችና በመከላከያ ሠራዊት ክፍሎች የሚሰጡ የጸጥታ ወይም የሀገር መከላከል ጉዳዩን በሚመለከት የሚሰጡ ውሳኔዎች ጋር የተያያዙ አቤቱታዎች፤
• መንግሥታዊ ያልሆኑ ድርጅቶች፤ ኃይማኖታዊ ድርጅቶች፤ ግለሰቦችን፤ መንግሥታዊና መንግስታዊ ያልሆኑ የውጭ ድርጅቶችን የሚመለከቱ ጉዳዮች ጋር የተያዙ አቤቱታዎች፡፡

አቤቱታ ማቅረብ

የአቤቱታ ማመልከቻ በመጻፍ ወይም ደግሞ የአቤቱታ ቅጵ በመሙላት ማቅረብ ይችላሉ፡፡ ቅጹን ከሕዝብ ዕንባ ጠባቂ ተቋም ዌብ ሣይት ማግኘትም ይቻላል፡፡ የአቤቱታ ማመልከቻ በተቻለ መጠን በአማርኛ ቋንቋ መቅረብ ያለበት ሲሆን፤ በእንግሊዝኛ፤ በትግርኛ፤ በኦሮሚኛ ወይም በማንኛውም የክልል የሥራ ቋንቋ መቅረብ ይችላል፡፡ አቤቱታው በተቻለ መጠን በጽሁፍ መቅረብ ያለበት ሲሆን በቃልም አቤቱታ ማቅረብ ይቻላል፡፡ ከዚህም በተጨማሪ የአቤቱታ ማመልከቻው ከዚህ በታች የተዘረዘሩት ነገሮችን ማሟላት አለበት፡-

• የአመልካች /አቤት ባይ/ ስም ከነአያት ድርጅት ከሆነ ሙሉ ስም እና ሙሉ አድራሻ፤
• የተጠሪ ሙሉ ስምና የተሟላ አድራሻ፤
• ጉዳዩ በሌላ ማንኛውም አካል በመታየት ላይ ያለ እንደሆነ ይህንኑ መጥቃስ፤
• ለአቤቱታው መነሻ የሆነና ቅር ያሰኘ ድርጊት ወይም ውሣኔ፤
• አቤቱታ አቅራቢው ለምን ድርጊቱ ወይም ውሳኔው ቅር እንዳሰኘው መጥቀስ
• አቤቱታው የሚቀርበው በወኪል ከሆነ የውክልና ሠነድ ኦሪጂናልና ቅጂ፤
• አቤቱታ አቅራቢው በዕንባ ጠባቂ ተቋም በኩል ምን እንዲደረግለት እንደሚፈልግ መጠቀስ አለበት፡፡
• ለአቤቱታው መነሻ የሆነውን ድርጊት ወይም ውሣኔን የሚመለከቱ ሠነዶች ቅጂዎች ከአቤቱታው ጋር ተያይዘው መቅረብ አለባቸው፡፡
• ማንኛውም አቤቱታ ለተቋሙ ከመቅረቡ በፊት በሚመለከተው የአስፈጻሚ አካል የመጨረሻ ውሣኔ ያገኘ መሆን አለበት፡፡
• የአቤቱታ ማቅረቢያ ቅጱን እዚህ ለዳውንሎድ እዚህ ያገኛሉ: የአቤቱታ ማቅረቢያ ቅጵ(እንግሊዝኛ) | የአቤቱታ ማቅረቢያ ቅጵ(አማርኛ)